قصتي مع الرزق : الجزء الثاني والاخير

التزوهيرة كانت كاتكون فالعواشر قبل العيدين تطورت ورجعت خدمت مع عبد الإله كايعطيني بلغة جايبها هو ب 20 درهم وكانبيعها ب 30 درهم يعني 10 دراهم ربح بيني وبينو هي 5 دراهم للواحد فالبياسة .. نتا وشطارتك ورزقك شخال بعتي .. من بعد خدمت مع خو عبد الإله الباطرون الكبير .. حسب ليا شي سلعة مصولديا يعني قديمة فيها الهمزة .. قال ليا اي بياسة بعتيها عندك فيها 10 دراهم فضل ... تشاركت حينها مع صديق لي في بيع دالشعالا وميكة اللحم والقنب وداكشي ديال عيد الأضحى وفنفس الوقت كانبيع الصباط هههههه الرزق أخي الزنجي يستحق التضحية ... المهم في اقل من اسبوع صوّرت اكثر من الف درهم .. زيدها كنت فكل عيد أضحى كانشوي الريوس للناس فالسيكتور كانطلع 500 درهم .. واحد العيد خدمت فالرحبة بالكروسا كانهز الحوالا انا وجوج دراري .. وفوق هذا كنت كانصلي بالناس التراويح عند سي خالد مبروك فمسجد أسعد بن زرارة حي الفرح اكادير .. السنة الأولى عطاوني إلى ماخانتنيش الذاكرة شي 3000 درهم بعدها صليت بيهم 3 رمضانات كايعطيوني بين 5000 إلى 8000 درهم ... ما تنساوش إلى هذه المدة كنت اي ريال شديتو كانعطيه للوالدة ... حتى جمعت شي مليون تقريبا ودرت حساب فالبوسطا حطيتو فيها .. المهم كايطلع شوية وينقص شوية من داك المليون والحاجة لي كانت فيا مزيانة الحمد لله ما كنتش مبلي ما كانضييعش فلوسي حتى الالتراس طلقتها فالدورة الثانية فالسيزيام وجمعت راسي .. المهم شديت الباك ودفعت للسعودية وفي انتظار ردهم قريت الشريعة والقانون سنتين .. تزادت على مداخلي لابورس كايعطيوني 39 الف ريال تقريبا ف 3 اشهر الاولي والثانية اما الاخيرة كايزوهروها كاتوصل ل 50 الف ريال .. ومع ذلك لم اتوقف عن البحث على رزقي فقررت نبيع التفرتيت قدام الليسي ديال الحي ...

كانقرا حينها فكلية الشرعية والقانون ايت ملول .. عندي سوايع قلال 16 ساعة فقط فالاسبوع .. وعندي الوقت فكرت نتحرك ندخل الرزق .. انا ساكن بجنب ثانوية الحاج سعيد الدراركي بالدراركة .. كنت كانمشي للخيام بالموطور عند واحد بولحيا كايبيع كراطن ديال التفرتيت ( التفرتيت كايجي من لوزين ديال ميلفاي ميلنهى ديك ديال الحانوت لي كاتدير درهم فالشركة كاتبجغ عليهم او كايخسر ليها لاكريم .. كايدوزوها فسيري خاص وكايديرو ليها لومبلاج خاص وكاتمشي لعند داك بولحيا فقط لانه شاري السوق ) المهم كان كايبيع ليا الكيلو ب 4.50 درهم .. كانخرج فيه كثر من 10 دراهم .. الكارطونة لي كانشري ب 45 درهم كانخرج فيها شي 40 تال 50 درهم ربح .. والكارطونة كانبيعا غير بين 10 دالصباح تال 12 كايخرج بنادم من الليسي فيه الهيمري وديك ميلفاي مسخوطة كاتشبع وكانوا شي مجرمين كايشريوها كايديرو فيها زيت الكيف باش تولي معجون .. لكن للامانة فاش كانشك فشي واحد باغي يدير هاكا ما كانبيعش ليه .. بصراحة تشهرت فالمنطقة لكها بل سماو عليها مول التفرتيت مدة من الزمن ما نساوهاش غير بالكشايف بهاذ مول الفوقية هي لي نساتهم ههههههههه وفاش كنت كانقرا كانخلي شي ولاد السيكتور مثلا " كيكا ، بيبز ، امونيش " هاذو كنت كانحسب ليهم البياس ونضور معاهم .. وكلن عزيز عليهم يقابلوا ليا الشهرة ممزوجة بالمكانة .. بحال البزنازة ههههه لي كايكون شاد الكاريطة كاتكون عندو مكانة خاصة ... حيث حنا لي كانبيعوا التفرتيت فداك القنت .. والبنات كايحماقوا على التفرتيت ما عرفت علاش .. المهم فلوس التفرتيت هوما باش كنت كانرولي ونسافر وندير ليصانص استغنيت عن مالين الدار تقريبا .. وديك المليون بقات كنت معول نزيد عليها ونتزوج ساعا خرج لينا بلان مع ابي كان خدام فمكة صيفط للوالدة الفلوس تجي للعمرة وانا ديك المليون خلصت بيها على راسي .. فاش جيت من العمرة رجعت خاوي بقات لرمضان شي 15 يوم .. الحمد لله صليت بيهم عاوتاين عطاوني حوالي 7000 درهم .. وبعدها بأيام طلعوا النتائج تقبلت للدراسة فالسعودية .. طلعت للرباط قاديت وراقي بهاذ الفلوس وخديت معايا شي بركة للسعودية وخليت شي الف درهم للوالدة ..
فاش مشيت للسعودية كانوا عاطينا السكن وكايخلصونا فوقها 840 ريال سعودي .. إلى كنتي كاتعرف تتصرف نصفها غادي يقدك فالشهر .. وفاش ياله جينا عطاونا شي 3000 درهم مغربية باش تدفع راسك .. وكايعطيو كل سنة 850 ريال سعودي باش تشري الكتب .. الله يسمح ليا خشيتها مع فلوس الزواج .. ( الزواج هو اللول الكتوبة ما كايبيريماوش وما غاديش يهربوا ) وكان القدر مخبي لينا واحد المفاجأة لم انتظرها في حياتي سبحان الله مات ملك السعودية الملك عبد الله رحمه الله .. وجا الملك سلمان وضوبل لينا الشهر الاول من ملكه ثلاث مرات يعني شدينا ( 840 + 840 + 840 ) ريال اكثر من 6000 درهم ديالنا .. المهم تسقرمت شوية ومن هنا ومن لهيه جمعت ديك البركة وفاش جيت للمغرب اول حاجة فكرت فيها هي الزواج قلبت أول بنت شفت وأول رؤية شرعية الحمد لله لقيت لي بغيت .. حتى والد زوجتي حفظه الله .. لم يسألني فين خدام ولا شحال كاتشد ولم يكلفني جيب جيب .. الخ ... المهم هاذي قصة أخرى ديال زواجي راه عاودتها ليكم ..
المهم ديك البركة لي جبت معايا كفاتني ودرت داك الخير على قدي ما جبتش الديدجي وما درتش الكريدي داكشي ما كايصدقش ربي كايبارك فالبساطة ويكمل وييسر .. والحمد لله جبت معايا زوجتي للسعودية وعايشة معايا وراني كاري .. وحاليا انا مدرس قران في مسجد هنا وكانشد ديك المنحة .. وعايش الحمد لله ملك في مملكتي لي صنعت بتوفيق الله ودعوات الصالحين ...
تم الحمد لله ... بغيت تعليقاتكم نساتفد منها وشكرا .