قصتي مع الرزق : الجزء الأول

بغيت نتزوج ولكن ماعنديش الفلوس ... هذا الجملة من كثرتها دفعاتني نشارك معاكم تجربتي الشخصية من أول درهم اكسبه بعرق جبيني .. باقي كانعقل فالسابعة يعني السنة الأولى اعدادي تبليت بتربية الحمام .. شريت زويجة عند صديقي ديال السفانس صافي وليت نشري ونبيع ونصييد عقلت أول زويجة بعتها شديت 50 درهم عطيتها للوالدة تخبيها ليا .. المهم دوزت فالحمام 4 سنوات لم يكن لي مدخول حينها إلا الحمام ومرة مرة كايدوروا معايا مالين الدار باش نشري ليه الماكلة فاش كانتحنسر .. فصيف بين السانكيام والسيزيام كنت حينها مبلي بالالتراس والاخوة لي مدوزين هاذ الضومين هوما لي كايعرفوا المعنى الحقيقي ديال التحنسير والزلط هههه واحد صاحبت الوالدة ( خالتي ام هند الله يرحمها ماتت قبل ايام دعيو معاها ) كان عندها محل فسوق الأحد اقترحت على أمي تأخذني عند واحد السييد حتى هو عندو محل كايبيع احذية النساء والصيكان باقي عاقل باب 6 البلان القديم فاش كانوا الزناقي صغار كاتدخل الزنقة لي على اليمين المحل الثاني على اليسار .. كانت ديك السيدة وصاتوا وصلنا عندو بعد العصر بشوية سلمت عليه تعرفت عليه مشات أمي وديك السييدة وبقيت معاه سميتو عبد الاله فهمي دكالي طويل ما شاء وعريض كث الللحية وقرع ( من اطيب خلق الله دابا هو فانز ممكن يكون كايقرا هاذ القصة دابا كانسلم عليه ولد الخير ) جمّعنا شوية رسلني للقهوى جبت اتاي والخبز والزيت باقي عاقل على داك الكاسكروط ديال الشانطي يا سلاااام ... المهم مع المغرب مشينا لمسجد السوق صلينا فاش رجعنا عطاني 10 دراهم وقال لي موعدنا غدا مع 9 الصباح ... رجعت للدار قلت كيفاش بلان هاذ خونا غادي نخدم ب 10 دراهم للنهار ؟ والخدمة ديال السوق صعيبة من 9 الصباح تال بعد المغرب ونتا غير واقف .. المهم الغد ليه اول نهار ليا رسمي وكان الصيف صعيبة شوية كاتشوف عشرانك شي مسافر شي هابط للبحر شي ناعس غير يعوض داك النبوري ديال القرايا هههههههه ونتا فايق تقول غادي تختارع الريزو بهاذ الاجتهاد. 

مع التسعود وقفت قدام المحل عبد الاله باقي ما جاش .. -كنت كانجي من الدراركة كاينة فطريق مراكش بالبيكالا تال سوق الاحد وسط اكادير تقريبا شي 10 كلم - تقريبا ديما كانجي قبل الباترون فداك الاول فيا الهم وكنت سخون ههههه البرنامج كان قاسح فالاول مع كايجي كانفرشوا السلعة كايجي السرباي الفطور ديال ديما بحلاوتو .. الغدا كنا مناقشين مع جيراننا كل نهار كايتقدا واحد ويطييب واحد .. والكاسكروط مرة مرة .. وبعد المغرب كانجمعوا ونمشيو ويعطيني 10 دراهم .. هههه قلتها للوالدة قالت لي غير صبر ما غاديش يخييبك ربي ... ايماجيني معايا اخي الافريقي تضرب كولشي هاذشي وتتخلص 10 دراهم فالنهار ..بصراحة هاذ النوطة كانت مديرونجياني .. المهم الحاجة لي خلاتني نحب الخدمة مع هاذ السييد هو الاخلاق .. بعد المرات كاندير افضعيسن وما كايقول ليا والو وايضا كان داير فيا الثقة كايخليني بوحدي فالمحل ويعاملني بحال خوه ماشي خدام .. داكشي علاش صبرت .. السوق كان كايسد نهار الاثنين عطلة .. فليلة الاحد فاش كملنا وجينا من صلاة المغرب عطاني 200 درهم خلاص زعما ديالي هههه واااو فرحت ديال بصح .. رحلتي مع عبد الاله لم تستمر كثيرا بسبب المحل لي كان خدام فيه كان صغير وما كايدخلش بزاف لذلك قرر يسلمني لواحد الباطرون اخر سميتو عبد الله ولد الشلح ... لي هو ايضا خدام عند خو عبد الاله سميتو عبد الله هذا الاخير عندو شبه شركة .. كايجيب السلعة من كازا وداير محالات كثااار كل محل حاط فيه باطرون وخدامة ... المحل الجديد كبييير اربع مرات من محل عبد الاله فيه الخدمة مضاعفة والباطرون الجديد قاسح شوية ونااااضي فيه المعقول كايجي بكري وكايخرج معطل وكايحماق على الفلوس .. فاش بدا المعقول بديت كانفكر نخرج من الخدمة لكن ديك 200 درهم كانت بالنسبة ليا الاكسجين لذلك قررت نبقى معاهم مدة 3 أشهر ديال الصيف ... شريت تيليفون سامسونج سكة حيناها شي حاجة والنضاضر كحلين هههه السبيد زعما والحوايج وكانت فيا واحد القاعدة قبل ما نتزوج .. اي ريال شديتو كانعطيه للوالدة تخبيه ليا .. حتى تزوجت ووليت كانحطهم تحت حوايجها لكن انا لي وليت كانتصرف فيهم ماشي هي ... من بعد تجربة السوق اكتسبت معارف وقوالب وتجااارب ووليت فكل عطلة او الويكاند كانهبط للسوق نضرب بريكولات ونضور صرييف تقريبا من السيزيام ما مديتش يدي للوالدين ديالي الحمد لله إلى يومنا ...

يتبع ...